25 қазан 2018 Конькимен жүгіру спортынан Қазақстан біріншілігі басталды
Астанада конькимен жүгіру спортынан Қазақстан біріншілігі басталды, деп хабарлайды Астана қаласы әкімдігінің ресми сайты.
Спорттық шараның салтанатты ашылуына ҚР ҰОК спорт дирекциясының жетекшісі Елсияр Қанағатов, Астана қаласы мәдениет және спорт басқармасының басшысы Болат Мажағұлов, «Алау» мұз сарайының директоры Санат Шарапов, Ұлттық конькишілер федерациясының президенті Болат Жәмішев қатысты.
Ел чемпионатына 8 аймақтан 100-ге жуық спортшы қатысып жатыр. Бірінші күні спортшылар 500 және 1000 метрлік қысқа қашықтықта күш сынасты. Қыздар 3 мың, ұлдар 5 мың метр қашықтыққа шықты.
Жарыс елімізде конькимен жүгіру спортын дамытуға және спорттың қай түрімен болсын шұғылдану керектігін, ел тұрғындары арасында насихаттауға бағытталған. Осы турнирде кімнің негізгі құрамға алынып, ірі жарыстарға қатысатыны анықталады. Чемпионатта ұлттық құрамадан бөлек, жасөспірімдер командасына да іріктеу жүргізілмек. Үш күнге созылатын жарыс «Алау» мұз айдынында өтуде.
Жарыс 26 қазанға дейін жалғасады.
Астана қаласының ресми сайттын материалы: http://astana.gov.kz/